Leviticus 11

Ukudla okuhlanzekileyo lokungahlanzekanga

1UJehova wathi kuMosi lo-Aroni, 2“Alibokuthi kwabako-Israyeli: ‘Kuzo zonke izinyamazana ezisemhlabeni, yilezi elingazidla;

3zonke izinyamazana ezilamangqina ehlukeneyo lezetshisayo lingazidla.

4“ ‘Zikhona ezinye ezetshisayo kuphela zibe khona ezinye ezilamangqina ehlukeneyo kuphela kodwa lingabozidla. Ikamela loba lisetshisa kalilamangqina ehlukeneyo; ngomkhuba alihlanzekanga kini. 5Imbila loba isetshisa kayilamangqina ehlukeneyo; ingcolile kini. 6Umvundla, loba usetshisa, kawulamangqina ehlukeneyo; ungcolile kini.

7Lengulube, noma ilamangqina ehlukeneyo ngokupheleleyo, ayetshisi; ingcolile kini.

8Akufanelanga ukuthi lidle inyama yazo njalo alifanelanga ukuthinta izidumbu zazo; zingcolile kini.

9“ ‘Kuzo zonke izidalwa ezihlala emanzini asolwandle lasezifuleni, lizakudla zonke ezilempiko lamaxolo. 10Kodwa zonke izidalwa olwandle lasezifuleni ezingela mpiko lamaxolo – kungenani ukuthi ngezihamba ngamaxuku kumbe phakathi kwazo zonke eziphila emanzini – lizenyanye. 11“Njalo njengoba lizazenyanya, lingabokudla inyama yazo lenyanye lezidumbu zazo. 12Yonke inyamazana ehlala emanzini engalampiko lamaxolo kumele yenyanyeke kini.

13“ ‘Lezi yizinyoni okumele lizenyanye njalo lingazidli ngoba zisenyanyeka: ingqungqulu, inqe, 14umzwazwa, ukhozi; kanye lazonke inhlobo zenkozi, 15imihlobo yonke yamawabayi, 16isikhova esilesicholo, isikhova esitshaya udweba, ingabuzane, imihlobo yonke yenkozi, 17umandukulo, isikhova esikhulu,

18isikhova senkangala, lokhozi oludla inhlanzi,

19lelinqe elikhulu, lelanda, lemvenduna, lolulwane. 20Zonke izibungu ezilamaphiko ezihamba ngezinyawo zazo ezine ziyenyanyeka kini. 21Kodwa kuzo izibungu ezilamaphiko ezihamba ngezinyawo zazo ezine lingadla lezo ezilamangqondo ezeqa ngawo emhlabathini.

22Kuzo lingadla isikhongwane ngenhlobo zazo, lamadiye ngenhlobo zawo, lezintethe ngenhlobo zazo. 23Kodwa zonke ezinye izibungu ezilamaphiko lenyawo ezine lizenyanye.

24“ ‘Liyabe liyazingcolisa ngalezi; ngakho loba ngubani othinta izidumbu zazo uzatshona engongcolileyo kuze kuhlwe. 25Ozaphakamisa isidumbu loba yisiphi salezi kumele ahlambulule izigqoko zakhe, kanti-ke yena uzabe engongcolileyo kuze kuhlwe.

26“ ‘Yonke inyamazana elengqina elingaphelele ukwahlukana kwalo loma engetshisiyo ingcolile kini, kuzakuthi wonke othinta isidumbu saloba yiphi yalezi uzabe engongcolileyo. 27Kuzo zonke izinyamazana ezihamba ngenyawo ezine, lezo ezihamba ngezidladla zingcolile kini; kuzakuthi wonke othinta izidumbu zazo abengongcolileyo kuze kuhlwe. 28Loba ngubani ozaphakamisa izidumbu zalezi kumele ahlambulule izigqoko zakhe, njalo uzatshona engongcolileyo kuze kuhlwe. Zingcolile kini.

29“ ‘Ezinyamazaneni zonke ezihambahambayo emhlabathini, lezi zingcolile kini: indlegu, igundwane, lemihlobo yonke yemibankwa emikhulu, 30untulo, imbulumakhasane, umbankwa, isiqhuza lonwabu. 31Kuzo zonke ezihuquzelayo emhlabathini, lezi zingcolile kini. Loba ngubani ozathinta sezifile uzatshona engongcolileyo kuze kuhlwe. 32Nxa kungafa eyinye yazo iwele phezu kolutho, lololutho, loba lusetshenziswani luzabe selungolungcolileyo, loba lwenziwe ngesigodo, ngelembu, ngesikhumba loba ngesaka. Lufakeni emanzini; luzabe lungcolile kuze kuhlwe, laphoke luzabe seluhlambulukile. 33Nxa esinye sazo singawela embizeni yomdaka, konke okusembizeni kuyabe sekungcolile, sekumele ubulale imbiza. 34Konke ukudla obekungadliwa okuchaphakelwe ngamanzi aleyo mbiza kungcolile, njalo lobekunganathwa kuvela kuleyo mbiza kungcolile. 35Loba yini ewelwe yizidumbu zalezi iba ngengcolileyo; iziko loba imbiza yokupheka sekumele kubhidlizwe. Kuyabe sekungcolile, njalo kumele likuthathe njengokungcolileyo. 36Kanti-ke umthombo, loba umgqomo wokukha amanzi uhlala uhlambulukile, kodwa loba ngubani othinta lezi zidumbu ungcolile. 37Nxa isidumbu salezi singawela loba kuyiphi inhlanyelo esilungele ukuhlanyelwa, izabe ihlambulukile. 38Kodwa nxa amanzi esethelwe enhlanyelweni, isidumbu salezi besesiwela phezu kwayo, isingcolile kini.

39“ ‘Aluba inyamazana elivunyelweyo ukuyidla ezifeleyo, lowo othinta isidumbu sayo uzakuba ngongcolileyo kuze kuhlwe. 40Loba ngubani ozakudla inyama yalesisidumbu kumele ahlambulule izigqoko zakhe, uzakuba ngongcolileyo kuze kuhlwe. Loba ngubani ozaphakamisa lesisidumbu kumele ahlambulule izigqoko zakhe, uzakuba ngongcolileyo kuze kuhlwe.

41“ ‘Loba yisiphi isinanakazana esihuquzelayo emhlabathini siyenyanyeka, kasingadliwa.

42Alifanelanga ukudla izinanakazana zonke ezihambahambayo emhlabathini, loba ngezihuquzelayo ngezisu loba ngezihamba ngazo zonke zone loba ngezilenyawo ezinengi; ziyenyanyeka. 43Lingazingcolisi ngalezi zinanakazana, lingazingcolisi ngenxa yazo njalo lingayekeli zilingcolisa. 44NginguJehova uNkulunkulu wenu, zihlambululeni libengcwele, ngoba mina ngingcwele. Lingazingcolisi ngezinanakazana ezihuquzelayo emhlabathini.

45NginguJehova owalikhupha eGibhithe ukuze ngibe nguNkulunkulu wenu; kungakho yibani ngcwele, ngoba mina ngingcwele.

46“ ‘Le yiyo imithetho emayelana lezinyamazana, lezinyoni, yonke into ephilayo entsheza emanzini lezinanakazana ezihuquzela emhlabathini.

47Kumele lehlukanise phakathi kwezingcolileyo lezihlambulukileyo, lehluka-nise phakathi kwezidalwa eziphilayo ezingadliwa kanye lalezo ezingafanele ukudliwa.’ ”